சட்டத்தரணிகளுக்குப் பாதுகாப்பு வழங்கத் தயார்; 11 இலட்சம் வழக்குகள் தேக்கம் – அமைச்சர் ஹர்ஷன நாணயக்கார அதிரடி!
உயிருக்கு அச்சுறுத்தல் இருப்பதாகக் கருதும் எந்தவொரு சட்டத்தரணியும் பொதுப் பாதுகாப்பு அமைச்சின் ஊடாகப் பாதுகாப்பைப் பெற்றுக்கொள்ள முடியும் என நீதி அமைச்சர் ஹர்ஷன நாணயக்கார தெரிவித்துள்ளார். கொழும்பில் இன்று நடைபெற்ற விசேட ஊடகவியலாளர் சந்திப்பிலேயே அவர் இதனைத் தெரிவித்தார்.
அக்குரெகொட கொலைச் சம்பவம்:
அக்குரெகொட பகுதியில் சட்டத்தரணி மற்றும் அவரது மனைவி சுட்டுக்கொல்லப்பட்ட சம்பவத்தைக் கடுமையாகக் கண்டித்த அமைச்சர், இந்த மிலேச்சத்தனமான செயலில் ஈடுபட்டவர்கள் தப்பிக்க முடியாது என்றும் அவர்கள் நீதியின் முன் முன்னிலைப்படுத்தப்படுவார்கள் என்றும் உறுதியளித்தார்.
எனினும், இச்சம்பவத்தை வைத்துக்கொண்டு அனைத்து சட்டத்தரணிகளுக்கும் அச்சுறுத்தல் இருப்பதாக எதிர்க்கட்சிகள் உள்ளிட்ட சில குழுக்கள் பரப்பும் செய்திகள் வெறும் அரசியல் கோஷங்களே என அவர் குறிப்பிட்டார்.
நீதிமன்றங்களின் தற்போதைய நிலை:
இலங்கையின் நீதிமன்றக் கட்டமைப்பில் தற்போது சுமார் 1.1 மில்லியன் (11 இலட்சம்) சிவில் மற்றும் குற்றவியல் வழக்குகள் நிலுவையில் உள்ளதாக அமைச்சர் அதிர்ச்சித் தகவலை வெளியிட்டார்.
காரணம்: ஊழியர் பற்றாக்குறையே இந்தத் தேக்கத்திற்குக் பிரதான காரணம். எதிர்வரும் மார்ச் அல்லது ஏப்ரல் மாதத்திற்குள் இப்பிரச்சினைக்குத் தீர்வு காண எதிர்பார்க்கப்படுகிறது.
புதிய திட்டங்கள்: வழக்குகளை விரைவுபடுத்த தலைமை நீதியரசர் முறையான திட்டமொன்றைத் தயாரித்துள்ளார். இதன்படி அளுத்கடை நீதிமன்ற வளாகத்தில் மேலதிகமாக 5 நீதிமன்ற அறைகள் உட்படப் பல புதிய நீதிமன்றங்கள் நிறுவப்படவுள்ளன.
டிஜிட்டல் மயமாக்கல்: நீதிமன்ற நடவடிக்கைகள் டிஜிட்டல் மயமாக்கப்பட்டதன் மூலம் செலவுகள் பெருமளவு குறைக்கப்பட்டுள்ளன.
குற்றவாளிகளைச் சிறையிலிடுவது நீதி அமைச்சின் தனிப்பட்ட பொறுப்பல்ல, அது பொலிஸ் திணைக்களம் மற்றும் நீதித்துறை ஆகியவற்றுக்கு இடையிலான ஒருங்கிணைந்த செயல்முறை என அவர் விளக்கினார். அத்துடன், நீதிமன்ற நடவடிக்கைகள் நிறைவடைந்த பின்னர், அங்கிருந்த உலோகப் பொருட்கள் ஏலம் விடப்பட்டதன் மூலம் 952 மில்லியன் ரூபாய் இலாபம் ஈட்டப்பட்டுள்ளதாகவும் அமைச்சர் ஹர்ஷன நாணயக்கார மேலும் தெரிவித்தார்.