இலங்கைத் தமிழ் அரசுக் கட்சியின் புதிய சுதந்திரன் பத்திரிகை மட்டக்களப்பில் இன்று வெளியீட்டு வைக்கப்பட்வுள்ளது!

டினேஸ்

இலங்கைத் தமிழ் அரசுக் கட்சியின் புதிய சுதந்திரன் பத்திரிகை வெளியீட்டு விழா இன்று 14ம் திகதி புதன்கிழமை காலை 09.30 மணிக்கு மட்டக்களப்பு மாநகரசபை நகர மண்டபத்தில் நடைபெறவுள்ளது.

இந்நிகழ்வில் இலங்கைத் தமிழ் அரசுக் கட்சியின் தலைமைகள், மதகுருமார்கள், இந்நாள், முன்னாள் பாராளுமன்ற உறுப்பினர்கள், முன்னாள் மாகாணசபை உறுப்பினர்கள், உள்ளுராட்சி சபைத் தேர்தலில் வெற்றியீட்டியவர்கள், கட்சி ஆதரவாளர்கள், பொதுமக்கள் எனப் பலரும் கலந்துகொள்ளவுள்ளனர்.

இதன் போது கட்சியினால் ஆரம்பிக்கப்பட்ட புதிய சுதந்திரன் பத்திரிகையானது மட்டக்களப்பு மாவட்டத்தில் உத்தியோகபூர்வமாக கட்சித் தலைமைகளால் வெளியிடப்படவுள்ளது.

திருகோணமலை மற்றும் யாழ்ப்பாணம் மாவட்டங்களிலும் புதிய சுதந்திரன் பத்திரிகை வெளியீட்டு நிகழ்வுகள் இட்ம்பெறவுள்ளன.

தந்தை செல்வாவின் காலத்தில் இலங்கைத் தமிழ் அரசுக் கட்சியினால் ‘சுதந்திரன்’ என்ற பெயரில் ஈழத்திலிருந்து ஒரு பத்திரிகை வெளியானது. சுதந்திரனின் முதல் இதழ் 1947 ம் ஆண்டு ஜூன் 1ம்திகதி அன்று வெளியானது. ஆரம்பத்தில் நாளிதழாக வெளிவந்த சுதந்திரன் 1951 முதல் வார இதழாக வெளிவந்தது. சுதந்திரனின் முதல் ஆசிரியராக இருந்தவர் கோ. நடேசையர். 1952 – 1961 காலத்தில் எஸ். டி. சிவநாயகம் ஆசிரியராக இருந்தார். பின்னர் கோவை மகேசன் ஆசிரியரானார். 1977 வரை கொழும்பில் இருந்து வெளியான சுதந்திரன் பின்னர் யாழ்ப்பாணத்திலிருந்து வெளியானது. இனக்கலவரத்தை அடுத்து ஏற்பட்ட அசாதாரண சூழ்நிலையின் மத்தியில் இந்தப்பத்திரியை வெளியீடு 1983 இறுதியில் நிறுத்தப்பட்டது.

35 வருடங்களின் பின்னர் தற்போது அது புதிய பரிணாமத்தில்’ புதிய சுதந்திரன்’ எனும் பெயரில் வெளிவரவுள்ளமை குறிப்பிடத்தக்கது.

By admin